काठमाडौं – १९ औं एसियाली खेलकुद अन्तर्गत नेपाली महिला टोली भिएतनामसँग पराजित भएको छ । समूह डी को पहिलो खेलमा नेपाली टोली भिएतनामसँग २–० गोलले पराजित भएको हो ।
पहिलो हाफ गोलरहित बराबरी खेलेको नेपालले दोस्रो हाफमा २–० गोल खाएको हो । भिएतनामका लागि ५३ औं मिनेटमा फाम हाइ एनले गोल गरेकी थिइन् ।
त्यसको १० मिनेटपछि अघिल्लो गोल सिर्जना गरेकी थि बीच थुइले गोल गरिन् । बायाँ विंगबाट आएको क्रसलाई उनले पेनाल्टी क्षेत्रभित्र डाइभमार्फत हेडरमा गोल गर्दै २–० को अग्रता दिलाइन् ।
नेपालले अब सोमबार समूहको दोस्रो खेलमा जापानको सामना गर्नेछ । समूहको अन्तिम खेल बंगलादेशसँग विहीबार हुनेछ । हरेक समूहबाट शीर्ष टोली र उत्कृष्ट ३ उपविजेता अघि बढ्नेछन् ।
