मकवानपुर । बागमती प्रदेश सभाको बैठक नेपाली कांग्रेसभित्रको आन्तरिक विवादका कारण आज पनि बस्न सकेन । आज दिउँसो १ बजेका लागि निर्धारण गरिएको बैठक अब असार १९ गते सम्मका लागि स्थगित गरिएको छ ।
प्रदेश सरकारले असार १ गते प्रस्तुत गरेको आर्थिक वर्ष २०८२/८३ को बजेटमाथि छलफल गर्न आह्वान गरिएको बैठक सत्ता गठबन्धन दलहरूबीच आवश्यक सहमति जुट्न नसक्दा स्थगन गरिएको हो । सत्तारूढ दल कांग्रेसभित्र नेतृत्व र भूमिकाको विषयमा देखिएको विवादका कारण संसद् सञ्चालनमै समस्या देखिएको छ ।
यसअघि पनि असार १२ गते बिहीवार बिहान ११ बजे बस्ने भनिएको बैठक दलहरूबीच सहमति नजुटेपछि स्थगन गरिएको थियो। पछिल्लो समय पटक–पटक बैठक बस्न नसक्दा बजेटमाथिको समयमै छलफल र पारित गर्ने प्रक्रिया प्रभावित हुने देखिएको छ।
प्रदेश सभा सचिवालयले आजको बैठक स्थगन भएको पुष्टि गर्दै अबको बैठक असार १९ गते बिहान ११ बजे बस्ने जानकारी दिएको छ।
