हेटौंडा– हिमालयन शेर्पा क्लब हेटौंडामा जारी पाँचौं स्थानीय तह सहिद स्मृति मकवानपुर गोल्डकप फुटबल प्रतियोगिताको फाइनलमा प्रवेश गरेको छ ।
सोमबार भएको दोस्रो सेमिफाइनल खेलमा शेर्पाले क्यामरुनी टिम एभिनियर एफसीलाई १–० गोल अन्तरले पराजित गरेको हो ।
हेटौंडा–५ स्थित पिप्ले क्याम्पा रंगशालामा भएको खेलमा हिमालयन शेर्पाको जितमा सुनिल श्रेष्ठ नायक बने । निकै प्रतिस्पर्धात्मक खेलको पहिलो हाफ गोल रहित बराबरीमा सकिएको थियो ।
दोस्रो हाफको सुरुवातीमै हिमालयन शेर्पा गोल गर्न सफल भयो । खेलको ५२ औँ मिनेटमा योउमीको पासमा सुनिल श्रेष्ठले गोल गरे ।
खेल अवधिभर एभिनियर एफसीले शेर्पालाई दबावमा राख्यो । तर पाएको अवसर भने सदुपयोग गर्न नसक्दा एभिनियरले हार ब्यहोर्न पुग्यो ।
निर्णायक गोल गरेका सुनिल श्रेष्ठ खेलको प्लेयर अफ द म्याच घोषित भए । उनले नगद १० हजार पुरस्कार पाए ।
अब हिमालयन शेर्पाले उपाधिका लागि मनाङ मस्याङ्दी क्बलसंग भिड्नेछ । प्रतियोगिताको फाइनल खेल फागुन १० गते हुनेछ ।
यसअघि प्रतियोगिताको पहिलो सेमिफाइनल खेलमा मनाङले विभागिय टोली सशस्त्र प्रहरी बल(एपिएफ)लाई पेनाल्टी सुटआउटमा पराजित गर्दै फाइनलमा स्थान बनाएको थियो ।
जिल्ला फुटबल संघ मकवानपुरको आयोजना भएको प्रतियोगिताको बिजेता टोलीले ट्रफिसहित नगद १५ लाख प्राप्त गर्नेछ भने उपविजेता हुने टोलीले ट्रफिसहित नगद १० लाख प्राप्त गर्नेछ ।
प्रतियोगिताको सर्बोउत्कृट खेलाडीले रोयल इन्फिल्ड बुलेट बाईक हात पार्नेछन् ।त्यस्तै विधागत उत्कृट हुने खेलाडी ट्रफिसहित नगद २५–२५ हजार प्राप्त गर्नेछन् ।
