हेटौंडा – मकवानपुरको हेटौंडा उपमहानगरपालिका १ चौकिटोलमा टिपरले स्कुटर र मोटरसाइकललाई ठक्कर दिँदा एक जनाको मृत्यु भएको छ भने १ जना घाइते भएका छन् ।
हेटौंडा–भैंसे सडक खण्डमा बुद्धचोकबाट भैंसेतर्फ जाँदै गरेको टिपरले विपरित दिशाबाट जाँदै गरेका बागमती प्रदेश–०३–००२ प ९० ४४ नम्बरको स्कुटर र बा ६३ प ३१ २० नम्बरको मोटरसाइकललाई शनिबार बेलुकी साढे ७ बजे एक्कैसाथ ठक्कर दिएको थियो ।
दुर्घटनामा गम्भीर घाइते भएका स्कुटरमा सवार हेटौंडा उपमहानगरपालिका वडा नं. १ जरुवाटोल बस्ने अन्दाजी २५ वर्षीय सुमित कपालीको उपचारको क्रममा हेटौँडा अस्पतालमा मृत्यु भएको प्रहरी चौकी चौकिटोलले जनाएको छ ।
घाइते भऐका स्कुटर चालक हेटौंडा उपमहानगरपालिका वडा नं. १० राप्तिरोड बस्ने २४ वर्षीय नितेश श्रेष्ठको सन्चो अस्पताल हेटौँडामा उपचार भइरहेको प्रहरीले जनाएको छ ।
दुर्घटनामा संलग्न रहेको आशंकामा एउटा टिपर सहित चालकलाई प्रहरीले नियन्त्रणमा लिएर अनुसन्धान सुरु गरिसकेको छ ।
